ايڏا وڻن ڏارڙا، ڪنهن لئه ڦولِن ٿا؟
*ڪنهن کي ڳولن ٿا، هيءَ سُوٽاڙيا سُڃ ۾؟
هيءَ جو جهنگ ڪڪڙ، آيو تنهنجي اوهه ۾،
تنهن کي ائين نه تڙ، سانجهيءَ ويلي سيءَ ۾.
ڪويل ڪوڪي انب تي، سارون سَوَ ڏيئي،
۽ اڏري ويئي، ڪُهه ڄاڻان ڪنهن پار ڏي؟
توکي ڳاراڻا، ڪُهه ڄاڻان ڪنهن ڳالهه جا؟
*ملان موراڻا، پُڇ وڃي ڪنهن پار تي!
*مُنڌ ڪڍيا ائين رنگ، جيئن سانوڻ ۾ ڏانگڙو،
شال انهي جي سنگ، گهاريان ٻه ٽي ڏينهڙا.
*سوٽاڙيو= ڪاٺ ڪُٽو
*جهنگ ڪڪڙ= هڪ پکي جيڪو اڪثر ڪري زمين تي هلندو رهندو آهي.
*ڏانگڙو= ٿر ۾ انڊلٺ کي چوندا آهن.
*ملان موراڻا= ٻهراڙيءَ جا ماڻهو تعويذ ڦيڻو ڪرڻ وارن لاءِ اهو اصطلاح ڪم آڻيندا آهن.