ديوان شوق
توکي ساريون پيا سدا، ديوانِ شوق!
عيد رمضان ڄڻ ملهائي آهي مون،
تنهنجي آئي دلربا ديوانِ شوق!
مان جڏهن ڀي ٿو ڪريان توسان ڪلام،
ٿو ڪرين موزون نواء ديوانِ شوق!
تون اهو پيغام ٿو پهچائين بس،
آهي جو جائز، روا، ديوانِ شوق!
ڇا ته آهي تنهنجو جلوو ۽ جمال،
خوشنما راحت فزا، ديوانِ شوق!
حسن تنهنجي جا ئي آهن باغ ۾،
بلبلن جا چهچها، ديوانِ شوق!
در ڌڻي ”صابر“ دعائون ٿو گهري،
شاد هوندين دائما، ديوانِ شوق!
5 مارچ 1986ع