آتم ڪٿا / آٽوبايوگرافي

ڳالھيون منھنجي ڳوٺ جون

ھن ڪِتاب ۾ بظاهر تہ خادم ٽالپر سندس ڳوٺ انڊهلي جي ڪھاڻي لِکي آهي، پر درحقيقت هيءَ ڪھاڻي ٿوري گهڻي فرق سان سنڌ جي سمورن ڳوٺن جي ڪھاڻي آهي. هِن ڪِتاب پڙهڻ سان پڙهندڙ جي ذهن جي اسڪرين تي ڳوٺاڻي زندگيءَ جي دِل پذير تصوير اهڙي سڀاويڪ نموني اُڀري اچي ٿي، جنھن ۾ فطرت جا سمورا دِلڪش رُوپ سروپ موجود آهن. ڳوٺ انڊهلو سنڌ جو مثالي ڳوٺ اُن ڪري بڻيو آهي، جو اُن ۾ رهندڙ ماڻھو ۽ سندن ڪِردار بہ مثالي آهن، جن کي سائين خادم هِن ڪِتاب ۾ سموئي نہ رڳو انڊهلي ۽ اُن جي واسين جي تواريخ رقم ڪئي آهي، پر اُن سان گڏ سنڌ جي هِڪ سٻاجهي دؤر کي بہ محفوظ ڪيو آهي

Title Cover of book ڳالھيون منھنجي ڳوٺ جون

پروفيسر ڊاڪٽر عبدالڪريم ٽالپر

سائين لطف علي جو وڏ فرزند عبدالڪريم 1948 ۾ ڳوٺ گل محمد ٽالپر ۾ پيدا ٿيو. 1951ع ۾ جڏهين سائين لطف علي پراڻي ڳوٺ گل محمد کان انڊهلي لڏي آيو تہ ساڻس گڏ سندس ڀائر امام بخش ۽ سھراب بہ گڏ لڏي آيا ٽئي ڀائر ڳوٺ جي اوڀر ۾ حاجي ڏتل جي گهرن جي پاسي ۾، اسان جي خالي ڪيل پڊ تي اچي ويٺا. تڏهين عبدالڪريم صرف ٽن سالن جو هو. جڏهين 1953ع ۾ انڊهلي ۾ پرائمري اسڪول کليو تہ عبدالڪريم بہ هتي داخلا ورتي عبدالڪريم سان گڏ نور محمد پٽ حاجي لعل خان بہ گڏ هو. ۽ منھنجي بہ هن اسڪول ۾ پھرين ڏينھن کان داخلا ٿي وئي هئي. اسان تڏهين کان دوست ٿي وياسين. آئون ٻہ سال وڏو هئس ان ڪري هڪ ٻہ ڪلاس مٿي هئس عبدالڪريم پنج ڪلاس پاس ڪيا تہ سندس والد صاحب سائين لطف علي کيس ٽنڊو باگو هاءِ اسڪول ۾ داخل ڪيو. جتان هن مئٽرڪ پاس ڪيو ۽ پوءِ مسلم ڪاليج حيدرآباد 12 ڪلاس پاس ڪري سنڌ يونيورسٽي ۾ ڪيمسٽري ۾ B.Sc ۾ داخلا ورتي. 1975 ۾ M.Sc پاس ڪيائين تہ کيس ترت 1976ع ۾ مھراڻ انجنيئرنگ ۽ ٽيڪنالاجي ڪاليج نواب شاھہ ۾ ليڪچرر طور چونڊجي ويو ٽن سالن بعد هو. مھراڻ انجنيئرنگ اينڊ ٽيڪنالاجي يونيورسٽي ڄام شورو ۾ بدلي ٿي آيو جتان پروفيسر طور ايڪيھين گريڊ ۾ 2008ع ۾ رٽائرڊ ڪيائين.
ڊاڪٽر عبدالڪريم ڳوٺ انڊهلو جو پھريون ماڻھو اهي جنھن P.HD جي ڊگري 1990ع ۾ سنڌ يونيورسٽي مان ورتي آهي. ڊاڪٽر صاحب ٻاروتڻ کان پرائمري اسڪول کان دوست آهي. صاف سٿرو جسم ۽ پاڪ صاف ذهن رکندڙ ڊاڪٽر صاحب سائنس جي جنرل موضوعن تي تمام گهونا گون معلومات رکي ٿو. هو سماج، سياست ۽ روزه مره جي معاملن کي بہ سائنسي اک سان ڏسي پروڙي ٿو. زندگي جي سمورن وهنوارن کي ٺوس منطقي بنيادن تي ڳولڻ سمجهڻ ۽ سمجهائڻ جي ڪوشش ڪندو آهي.
محفل ۾ گهٽ ڳالھائو، سمجهدار، سچ ۽ حق جي ڳالھہ کي بي باڪي سان ان جو طرفدار ٿي بيھي ٿو ڳوٺ جي سمورن ڀلائي جي ڪمن، اسڪول، روڊ، رستا، بجلي، گئس، واٽر سپلاءِ جي ڪمن لاءِ مثبت سوچ رکي ٿو وس پڄندي سڀني ڪمن ۾ حصو وٺي ٿو. عام ڏيکاءَ ۽ شوبازي کان پاسو ڪندڙ هوندو آهي. سماجي طور تي پنھنجي طرفان ڪجهہ ضرورتمند جي بنا گهرڻ جي مدد ڪندو آهي.
ڊاڪٽر عبدالڪريم جي هڪ نياڻي ڪيمسٽري ۾ BS ڪئي آهي جيڪا ڪنھن اسڪول ۾ جاب ڪري ٿي. سندس ٻہ ڇوڪرا سائنس گريجوئٽ آهن. جليل الرحمٰن ڪيمسٽري ۾ ۽ عبدالجميل ڪمپيوٽر سائنس ۾ BS آهن جڏهن تہ ڊاڪٽر عبدالڪريم جو وڏو فرزند خليل جبران گريجوئٽ آهي جنھن کي هڪ پٽ مير فيضان آهي جيڪو ٽي ڪلاس ۾ پڙهي ٿو. هي سڄو خاندان ترقي پسند سوچ، انساني فلاح ۽ بهبود لاءِ پاڻ کي وقف سمجهي ٿو.