ٽالپرن کان سواءِ ٻيون ذاتيون ۽ قبيلا
شيدي؛
چون ٿا تہ 100 سال اڳ هن ڳوٺ ۾ لواري شريف کان هارون شيدي لڏي آيو. هارون کي شادي ڪرايائون تہ سندس زال گھر نہ ويھي ان ڪري کيس لواري شريف مان لڏائي انڊهلي موڪليائون. هتي سڄي ڄمار رهيو پيو هو ان جا ٻہ پٽ ٿيا هڪ جو نالو سومار ۽ ٻي جو نالو علي محمد هو. اهي ٻئي ڀائر تہ گذاري ويا آهن پر انھن جو اولاد ويٺو آهي. هنن جون عورتون هن ڳوٺ ۾ شادي وهانءَ تي ناچ گانو ڪنديون آهن يا ڳوٺ ۾ شادي غمي جو موقعو ايندو آهي تہ اهي عورتون سڄي ڳوٺ ۾ گھر گھر وڃي عورتن کي نينڍ/ دعوت ڏئي اينديون آهن. صديق شيدي هن ڳوٺ جو هڪ تمام هوشيار رازو آهي. هن ڳوٺ جا اڪثر گھر صديق شيدي تعمير ڪيا آهن.
خاصخيلي؛
خاصخيلي هن ڳوٺ ۾ ڪئين سالن کان رهيل آهن. اسان ننڍا هوندا هئاسون تڏهن ڪالوُ، سليمان، يوسف، اسحاق ۽ ٻيا خاصخيلي رهيل هئا. لواري شريف جي پيرن جو پاڻ ۾ ڪو تنازع ٿيو تہ هي خاصخيلي اشرف آباد واري ڌر جا حمايتي هئا. جڏهن تہ انڊهلي جا ٽالپر تن ڏينھن ۾ لواري شريف جي گادي نشين پير گل حسن شاھہ جا پيروڪار هئا ان سبب خاصخيلين کي انڊهلي مان لڏي اشرف آباد وڃي رهڻو پيو. جڏهن تہ هاڻي انڊهلي جا سمورا ماڻھو اشرف آباد واري ڌر پير محمد صادق جا حمايتي آهن
هن وقت وري ملھار خاصخيلي ڳوٺ جا ڪجه گھر لڏي اچي انڊهلي ۾ ويٺا آهن. جن ۾ الھہ رکيو خاصخيلي جو خاندان، علي محمد، عبدالحڪيم شامل آهن. اسان جي پرائمري اسڪول جو استاد سائين محمد اسماعيل خاصخيلي بہ ملھار خاصخيلي جي ڳوٺ کان لڏي اچي انڊهلي کي اوڏو ٿيو آهي.
ميگھواڙ؛
هن ڳوٺ ۾ سوماريو ميگھواڙ 1950ع کان اڳ ٿر جي ڳوٺ ننھائين کان سيزنل لڏي اچي ڳوٺ ۾ رهندو هو پر پوءِ پنھنجي پورهيئي خاطر مستقل هتي رهي پيو. سوماريو تہ گذاري ويو ان جا ٽي پٽ هئا نارو، عمريو ۽ منگليو. عمريو گذاري ويو آهي، منگليو ڪافي اڳ هتان هليو ويو. باقي نارو ۽ عمريي جو اولاد هن ڳوٺ ۾ رهيل آهن جن مان ڪجه پوليس ۾ نوڪري ۾ آهن ڪي رازا آهن ۽ ڪجه ٻيا هنري ڪم ڪن ٿا.