ڏيهن جو ڏاتار تون ئي سائين آهين!
جڳ جو پالڻهار تون ئي سائين آهين!
اڀ ڌرتي تو جوڙي آهي،
خلقت جوڙي جوڙي آهي.
بيشڪ خلقڻهار تون ئي سائين آهين!
چنڊ اڀارين سج اڀارين،
ويراني ۾ ٻج اڀراين.
رازق رب ستار، تون ئي سائين آهين!
موت حياتي تنهنجي وس ۾،
ڍال ۽ ڪاتي تنهنجي وس ۾.
فتح ڏئين يا هار تون ئي سائين آهين!
ڌرتي سائي اڀ ۾ تارا،
رنگ نرالا انڊلٺ وارا.
ارپين ڪل سينگار تون ئي سائين آهين!
پٿر اندر جيون پلجي،
باهه ڀڀڙ ۾ گلشن پلجي.
وهوا ڪاروبار تون ئي سائين آهين!
اڻ کٽ آهي مهر جو ساگر،
ٻاجهه گهري ٿو ”بروهي جوهر“.
هيڻن جو آڌار تون ئي سائين آهين!