شاعري

دانھون ٻوڙيل ديس جون

”بيوس“ بخش علي چانڊيو ھڪ حساس شاعر، استاد ۽ سماجي ڪارڪن آھي. سنڌ ۾ جولاءِ ۽ آگسٽ 2022ع جي غير معمولي برساتن ۽ ٻوڏ جي تباهيءَ جتي لکين ماڻھن کي معاشي بدحالي، ڪيمپن ۾ لاوارثي ۽ دربدريءَ جي وَر ڪيو، اتي بدانتظامي، اقربا پروري، ڪرپشن ۽ واڳ ڌڻين جي بي حسيءَ وڏي انساني الميي کي جنم ڏنو. ان صورتحال ۾ ”بيوس“ بخش علي چانڊيي جي قلم مان هي سٽون سرجي نڪتيون، جيڪي ڪتابي صورت ۾ اوهان جي آڏو آهن. هُن ساڃاهوند ۽ سماجي ڪارڪن جي حيثيت سان ان سموري لڏپلاڻ، ڪيمپن جي وهنوار ۽ امدادي ورڇ سميت مڙني مامرن کي ويجهڙائيءَ کان ڏٺو ۽ انھن سڀني پيڙائن ۽ ڀوڳنائن کي محسوس ڪيو ۽ ان کي پنھنجي شاعريءَ ۾ قلمبند ڪيو آهي. 

Title Cover of book دانھون ٻوڙيل ديس جون

نعت

هر طرف ٿيو نور جو، جنسار جلوو جا بجا،
آيو محمد مصطفيٰ، صلي عليٰ، صلي عليٰ.

عرب جي ڌرتيءَ مٿان چمڪي، نئين چانڊاڻ آ،
عرش تي ۽ فرش تي، خوشيون، جشن مانڊاڻ آ،
پئي اچي هر جاءِ تان، صد مرحبا واري صدا،
آيو محمد مصطفيٰ، صلي عليٰ صلي عليٰ.

پيون پڙهن حورون ادب مان، عرش تي جهونگار آ،
مرحبا خير البشر، جي تند ھيءَ تنوار آ،
پيا چون مٺڙا ملائڪ، عرش تي نعتون ادا،
آيو محمد مصطفيٰ، صلي عليٰ، صلي عليٰ.

هي جشن ايڏو ڀلا، ڪنھن لاءِ ۽ ڪنھن ڪاڻ آ،
چئوطرف پکڙي وئي خوشبوءِ ۽ سرهاڻ آ،
ٿا پکي ٻولينّ مٺيون ٻوليون، چمن ۾ چھچٽا،
آيو محمد مصطفيٰ، صلي عليٰ، صلي عليٰ.

ٿيو جڏھن تشريف فرما، سيدالڪونين آ،
قيصروقصرا جي ڪوٽن جا وڃي ڪنگرا ڪريا،
ھي ٻڌي آواز غيبي، عجب ۾ پئجي ويا،
آيو محمد مصطفيٰ، صلي عليٰ، صلي عليٰ.

بخش علي “بيوس” سندي، آھي صدا منھنجا خدا،
شل مديني ۽ مڪي، حرمين ڏي جلدي گهرا،
گنبذ خضرا جي سامھون، آخري ٿئي الوداع،
آيو محمد مصطفيٰ، صلي عليٰ، صلي عليٰ.