هيءَ آھي سراسر، ڳالھہ سچي، اسان هٿ سان ٻوڙيا ويا آھيون،
نہ ٿو ڪير ڏئي، آٿت ڪو اچي، اسان هٿ سان ٻوڙيا ويا آھيون.
بند لنگهہ ڪيئون سڀ پاڻيءَ جا، ڍورن تي بہ رئيسن قبضا ڪيا،
برسات مٿان، نہ ڪا چيڙھہ بچي، اسان هٿ سان ٻوڙيا ويا آھيون.
سم نالا بہ بند، ابتا پيا هلن، ٻاهر جو بہ پاڻي کنيو ٿا اچن،
سڀئي کوھہ لٽيل گاري ۾ گچي، اسان هٿ سان ٻوڙيا ويا آھيون.
نيڪال ڪڍڻ ڪنھن ڪونہ ڏنو، ڪمرو بہ ڪري پيو ڪوٽ ڇنو،
وڃي پٽ تہ پئي ادا جاءِ ڪچي، اسان هٿ سان ٻوڙيا ويا آھيون.
ڪئمپن ۾ سھولت ڪا ڪانھي، ماڻھن ۾ فضيلت بي ڪانھي،
ڏسي اندر پوي ٿو پڄري پچي، اسان هٿ سان ٻوڙيا ويا آھيون.
ڊي سين کي ڪروڙين روڪ مليا ڪا خبر نہ پئي سي ڪاڏي ويا،
راشين جا ويا ڀائو، رنگڙا رچي، اسان هٿ سان ٻوڙيا ويا آھيون.
الزام سڄو هو قدرت تي ڏين، افعال پنھنجا پر ڪونہ ڏسن،
کائي مال پرائو ٿيا مست مچي، اسان هٿ سان ٻوڙيا ويا آھيون.
“بيوس” نہ فقط! بي هوش بہ آ، نعرن جي پٺيان، مدهوش بہ آ،
گهڙي ترس وٺي ڀلي قوم نچي، اسان هٿ سان ٻوڙيا ويا آھيون.
****