دائرن جو گهيرو
درد ويتر جنون ۾ آهي
ڪيڏي گهري سڪون ۾ آهي
جاڳ جيڪا جلي جڳن کان پئي
ننڊ ان جي اجاڙ وادين تي
پر انڌيرن جي روءِ ڦهلايا
بيقراري قرار ۾ آهي
گهاءُ هر هڪ وسار ۾ آهي
ڪوئي تختو نه ياد ڦاهيءَ جي
قيد جي جرح جي گواهيءَ جي
زهر جيڪو وڃي فرانس پڳو
زهر جي ڪِيسَ جي تباهيءَ جي
ڪا انوکي ڪُريت رشتن جي
اجنبي رسم، ريت جذبن جي
گهر جي آڏو چنگهاڙ جوڀن جي
جسم کان آر پار گولين جي
خون آلود سرد جسمن جي
دست قاتل تي رت جي ڦهنگن جي
ياد ڪا درد جي گهڙي ناهي
ڪا به ساعت هينئر ڪڙي ناهي
ذهن تي هر طرف انڌيرو آ
رات جي دائرن جو گهيرو آ.
_______________________________________________________
بيگم نصرت ڀٽو جي ڪوما ۾ هجڻ واري خبر تي بينظير ڀٽو شهيد جي حياتيءَ ۾ لکيل نظم