شاعري

دَرد گهُنگهرو ٻَڌا

احساس ميرل سَيبتو سُڄاڻ شاعر آهي، جنھن پنھنجي شاعراڻي پنڌ ۾ سٺي مڃتا حاصل ڪئي آهي، اِها مڃتا کيس وقتائتي سُندر شاعريءَ جي حوالي سان ملي آھي. احساس سچ تہ سھڻن احساسن جو شاعر آهي. پياري احساس ميرل وٽ شعري حوالي سان کوڙ سارا موضوع آهن. قوميت ۽ محبت سان گڏ هن زندگيءَ جھڙي منجهائيندڙ موضوع يا هڪ ڏُکي ڳُجهارت تي پڻ گهڻو ڪجهه سوچيو ۽ لوچيو آهي. احساس ميرل جي زيرِ نظر شعري مجموعي اندر اسان کي غزل جي صنف اندر مختلف موضوعن، خيالن ۽ احساسن جي اُپٽار نظر اچي ٿي. 

Title Cover of book دَرد گهُنگهرو ٻَڌا

سِڪ سرديءَ جي ساڙ وانگي آ.

سِڪ سرديءَ جي ساڙ وانگي آ.
تنھنجو ڀاڪر اماڙ وانگي آ.

تنھنجي يادن جا ڌڻ سنڀالي ٿو،
منھنجو جيون ڌراڙ وانگي آ.

منھنجا جذبا ڪکن پنن وانگي،
تنھنجو لھجو لَتاڙ وانگي آ.

کوڙ ڪوشش ڪيم کلڻ جي پر،
درد دل جو سَپاڙ وانگي آ.

رنگ ڪاڇو ته نيڻ ڪشموري،
۽ طبيعت ۾ لاڙ وانگي آ.

خالي تقرير ۾ گرم جوشي،
گُفتو گفتو لٻاڙ وانگي آ.
✤✤