شاعري

دَرد گهُنگهرو ٻَڌا

احساس ميرل سَيبتو سُڄاڻ شاعر آهي، جنھن پنھنجي شاعراڻي پنڌ ۾ سٺي مڃتا حاصل ڪئي آهي، اِها مڃتا کيس وقتائتي سُندر شاعريءَ جي حوالي سان ملي آھي. احساس سچ تہ سھڻن احساسن جو شاعر آهي. پياري احساس ميرل وٽ شعري حوالي سان کوڙ سارا موضوع آهن. قوميت ۽ محبت سان گڏ هن زندگيءَ جھڙي منجهائيندڙ موضوع يا هڪ ڏُکي ڳُجهارت تي پڻ گهڻو ڪجهه سوچيو ۽ لوچيو آهي. احساس ميرل جي زيرِ نظر شعري مجموعي اندر اسان کي غزل جي صنف اندر مختلف موضوعن، خيالن ۽ احساسن جي اُپٽار نظر اچي ٿي. 

Title Cover of book دَرد گهُنگهرو ٻَڌا

ماڳ ته کوڙ مثالي آھن

ماڳ ته کوڙ مثالي آھن.
چورَ مگر ٿيا والي آھن.

منھنجي رستا روڪ ٿئي ٿي،
دَر دَر تنھنجا پالي آھن.

سچ ٻڌڻ جي ھمت ناھي،
اھڙا جام جلالي آھن.

جيجل تي سر مُرڪي ڏيندا،
جيڪي پُٽ حلالي آھن.

ياد پرينءَ جي مَئي وانگي آ،
جذبا مست موالي آھن.

منھنجي قسمت ۾ تون ناھين،
ھٿ جا ليڪا خالي آھن.
✤✤