شاعري

دَرد گهُنگهرو ٻَڌا

احساس ميرل سَيبتو سُڄاڻ شاعر آهي، جنھن پنھنجي شاعراڻي پنڌ ۾ سٺي مڃتا حاصل ڪئي آهي، اِها مڃتا کيس وقتائتي سُندر شاعريءَ جي حوالي سان ملي آھي. احساس سچ تہ سھڻن احساسن جو شاعر آهي. پياري احساس ميرل وٽ شعري حوالي سان کوڙ سارا موضوع آهن. قوميت ۽ محبت سان گڏ هن زندگيءَ جھڙي منجهائيندڙ موضوع يا هڪ ڏُکي ڳُجهارت تي پڻ گهڻو ڪجهه سوچيو ۽ لوچيو آهي. احساس ميرل جي زيرِ نظر شعري مجموعي اندر اسان کي غزل جي صنف اندر مختلف موضوعن، خيالن ۽ احساسن جي اُپٽار نظر اچي ٿي. 

Title Cover of book دَرد گهُنگهرو ٻَڌا

حلالي پُٽ

رَڳن ۾ خونُ ٽھڪي ٿو،
اکين ۾ خواب تڙپن ٿا،
زنجيرن ۾ ٻڌل سپنا،
رَسن ٿا سرد خاني ۾..!!
ٿيو ڇا ڇا زماني ۾..!!
رکي ويو گھر جو ڀاتي آ،
اُماڙي آشياني ۾،
جفا ڇُڙواڳ جيئن ٿي آ،
وفا ڄڻ ٿي وئي اڻلڀ،
ڌڃاڻيون سونَ جي گھر جون،
پني پٽَ سَٽ پَليون آهن..!!
سدائين هيڪليون آهن..!!
سمھن ٿا ساٽَ ۾ سانگي،
نه گھرڙا ۽ رليون آهن،
ائين جيئن برف ڳرندي آ،
حياتيون ائين ڳريون آهن،
دليون پٿر ٿيون آهن،
بھارون سوڳ ۾ ورتل،
خزان حاڪم بڻي آهي،
جوانيءَ کي لڳا جھولا،
رَڙِي آهي ڇڻي آهي،
اسان جا ماڳ کسجن پيا،
نه ٿيو ڪوڀي ڌڻي آهي،
سڏائي پُٽ جيجل جو،
وري جيجل جو دشمن ٿيو،
لُٽي ٿو خوب جذبن کي،
هڻي ٿو کوکليون هامون،
ڀري ٿو پيٽ پنھنجو بس،
اُٿو! جاڳو اُٿو! جاڳو،
اڃان ڀي وقت ناهي ويو،
ڪيون سڀ مالڪي پنھنجي،
حلالي پُٽ جيڪر ٿيون،
اسانجو بخت ناهي ويو،
ڪيون مضبوط پيرن کي..!!
ڀڄايون اڄ لُٽيرن کي..!!
ڀڄايون اڄ لُٽيرن کي...!!
✤✤