نَوان پُراڻا سڀئي رشتا ساڙي اَچُ
خود سان پڻ تون سڀ لاڳاپا ساڙي اَچُ
سار لھان مان ڪنھنجي ڪنھنجي ڪئن آخر ؟
درد،خوشيون ،ڳڻتيون،اوجاڳا ساڙي اَچُ
پڙه تون ، ڀل پڙه، پر ڇا پڙھجي ؟ سوچ ذرا
ڀرمائڻ وارا سڀ پوٿا ساڙي اَچُ
آزاديءَ جي جنگ اڃا ڀي جاري آ
ماضيءَ جا پاروٿا نعرا ساڙي اَچُ
پياس لڳي ٿس پاڻي گهُرجي اَبھم کي
گنگاجل، آب زمزم ڇا! ساڙي اَچُ
ڦير ۾ ڦاٿل ليِڪُن جي ڪيسين رھبو
رنگ رنگيلا ڪاڳر، نقشا ساڙي اَچُ
راند نئين اَھڙي ڪا يارو گڏجي کيڏيوُن
هار جيت جا سڀ پئمانا ساڙي اَچُ