ماڻھوُ ماڻھوءَ سان مِلَندو آ زورَڪَٿِيو
هر ڪوئي ٻي کي سَھَندو آ زورَڪَٿِيو
پيارُ، مُحبّت اَثرُ وِڃائي ويٺا هِتِ
مُرڪَ، چُميِ، ڀاڪُر لڳَندو آ زورَڪَٿِيو
لِڦوُن لِڦوُن پيرَ وَقتَ جا آهِن هِتِ
لُڇيِ لُڇيِ لَمحو چُرندو آ زورَڪَٿِيو
شاھُہ، سَچَلُ، ساميِ ڇا ڇا آھي ھُنَ وَٽِ
وَقتُ ڪَڍيِ وِرلي پَڙھندو آ زورَڪَٿِيو
ٻوَٽِن ۾ گُلَ پِڻ ھاڻي ٽِڙَن ڪِٿي ٿا
گُلشنَ ۾ ڪو گُل ٽِڙَندو آ زورَڪَٿِيو۔