اُڃَ اِلاهي، پياس اِلاهي، مُنھِنجو وَرثو
بَرپٽ ۾ بادلُ وَسَندو آ ايڪڙ ٻيڪڙ
کوڙَ وڃن ۽ کوڙَ اَچن ٿا مُنھنجي دل ۾
ورهيه، صديون ، يگ ڪو ٽڪندو آ ايڪڙ ٻيڪڙ
قطرو قطرو ٿي لُڙڪ ڳڙن ۽ سُڪي وَڃَن
ڪو ورلو موتي بڻبو آ ايڪڙ ٻيڪڙ
پَل پَل بي معنيٰ وقت ڦِري سارو جيِوَن
ڪو دل ۾ پيھي ويندو آ ايڪڙ ٻيڪڙ
واڻَ جي کٽ تي گُم سُم ويٺو ھوندو آھي
بابو آکاڻي کڻندو آ ايڪڙ ٻيڪڙ
وِريي وَڄَن دُهل، توتارا بَھِراڻن ۾
مورُ بَڻي مَنُ ھيءُ نچندو آ ايڪڙ ٻيڪڙ
گهاوَ مٿان گهاوَ لڳن، جنگ اَندرَ ۾ جاري
ٻِڙڪَ بِہ ٻاھر هو ڪڍندو آ ايڪڙ ٻيڪڙ