آنءُ نِرواڻُ مُڪتي وَٺي ڇا ڪَندُس
غَمَ سَمورا ڏَئيِ ھڪ خوشي ڇا ڪَندُس
ڪينَ آيو نظر جي انڌيرن ۾ هوُ
چَنڊ سِج کان گهُري روشني ڇا ڪَندُس
بي گناهي ڪري ڪين ثابت سَگهان
قيد مان پو رِهائي گهُري ڇا ڪَندُس
مُنھنجيِ ڪاغذ جي ڪشتي تَري ڪينَ ٿي
وڏڦُڙي مينھَن پويان ڊُڪي ڇا ڪَندُس
قتل ھن جي عِنايت سان ٿيندو رھيس
ڪائي تَلوار ڪائي ڇُري ڇا ڪَندُس
هو نظرِ ڪين آيو اَڃا خوابَ ۾
ننڊ گَھِري يا ڪَچڙي اُٿي ڇا ڪَندُس
ليِڙوو ليِڙون لَٽو روزُ ڦاٽيِ پَوي
وقتُ ڳاري سِبان پر سِبي ڇا ڪَندُس
ڪا وَسي ها تَتَل ريتِ تي بوند ھِڪَ
ٻوڏِ آڻي ڇَڏي سا نَديِ ڇا ڪَندُس