توکي سَڀُ مِلندو پَڪَ نَہ سَمجهہ
ڪُجهہ رَهِجي ويندو پَڪَ نَہ سَمجهہ
پيارَ مُحبّت ۾ سگهہ آھي
سَڀُ حاصل ٿيندو پَڪَ نَہ سَمجهہ
ٻوُر جهَليو آ سُپنن جي وَڻ
هر ڪو ڦل رَسندو پَڪَ نَہ َسمجهہ
واقُف ناهين بَرپٽ کان تون
هر بادل وَسندو پَڪَ نَہ سَمجهہ
کنڀَ پَکي کولي اُڏڙي ٿو
هوُ اَنبَرُ ڇُھَندو پَڪَ نَہ سَمجهہ
مُلھُہ تَہ آھي ورثي جو، پر
ڪو سانڍي رَکندو پَڪَ نَہ سَمجهہ
روحُ لڳي ٿو بيھوشيَ ۾
حَق لءِ ڪو وڙھندو پَڪَ نَہ سَمجهہ
ھَوا هَلي آ ، کڙڪو ٿيو آ
ھاڻي دَرُ کُلندو پَڪَ نَہ سَمجهہ
تيل ڏِئي ۾ وَٽِ پِڻ سالِم
بس فوراً ٻَرندو پَڪَ نَہ سَمجهہ
هَر ذَري سان پيار ڪَندو چَنڊُ
هر ڪنھن کي چُمندو پَڪَ نَہ سَمجهہ
سُقراط ھُجي، مَنصوُر ھُجي
ڪو جِئرو رَھندو پَڪَ نَہ سَمجهہ
ڀَل نہ ھُجي سِڪّو کوَٽِو ڪو
دُنِيا ۾ ھلندو پَڪَ نَہ سَمجهہ