توکي پرکيان وري خيال آيو
دلربا زندگي خيال آيو
ڪِئن رُسان، ڪِئن ڪيان ڪا ڪڍي ڳالھہ
ناھي ھوءَ اوپري خيال آيو
مُرڪ، ماڻا ، چُمي هِڪُ يا ڀاڪُر
ڪا تَہ ڏي سوُکڙي خيال آيو
گوال، ڪرشڻ آ مَن ۾ گوپيون پڻ
سانتِ ڇو بانسُري خيال آيو
ويدَ، بائيبل ، قرآن ۽ گيتا
سارُ آ شاعري خيال آيو
ڪر انڌيرن سان پيارُ مَنُ لائي
ڀرمُ آ روشني خيال آيو
گنگا، جمنا رَکَن اُڃايلُ ٿيون
سِنڌو وِڇڙي وئي خيال آيو
چنڊَ، سِجَ جي خطا ھئي جيڪا
شام تنھا رُني خيال آيو
مؤت تائين رهي محبّت شل
ڪِئَن ڪَيان اَڳڪٿي خيال آيو
ساھُ وَر وَر پِرين سُڪي ٿو وڃي
رکجي اَک ۾ نَدي خيال آيو
تون مُحبّت ڪرڻُ نَٿي ڄاڻي
مُنھنجو ھَٿُ، ڇَڏِ چَري، خيال آيو