خواب نئون ڪو ڳِنھي اَچان خَرچُ وڏو آ
بند اَکيون جي سانت رَھان خَرچُ وڏو آ
ياد ڪيان ھن کي دل ۾ هر پَل، هر کِن
ھُن تائين مان ڪيئن وَڃان خَرچُ وڏو آ
چَنڊَ، سِجَ جي، تارَن جي ڳالھہ نہ ڪَرِ تون
ٻاري ھڪڙو ديپُ رَکان خَرچُ وڏو آ
سِنڌُ پَري، شاھُ پَري مَنُ ويڳاڻو آ
ڪِئن سرحد ھيءَ پار ڪَيان خَرچُ وڏو آ
قتل ڪيا پنھنجا سُپنا پنھنجي هَٿَ سان
ڪنھن تي ڪوُڙو ڏوُھ ھڻان خَرچُ وڏو آ
ڦاٽل ڪپڙن ۾ اڃا اَمان جي سِڪ آ
سُئي سڳو آ، ڇو نہ سِبان خَرچُ وڏو آ
لُڙڪَ اَمانت سانڍي رکندس سيني ۾
سَمُنڊ جيان جي ڇول ٿيان خَرچُ وڏو آ
باھ وسامي پر ٽانڊا قائم آهن
ٿوري جي مان ڦوُڪَ ڏِيان خَرچُ وڏو آ
شامَ سَڄي، راتِ سَڄي ، ڏينھُن سڄو تنھا
ڪنھن کي پنھنجي ساڻُ کڻان خَرچُ وڏو آ
سَچَ کي سَچُ چَئِبو، همٿ ڪبي، جانِ ڏِبي
ماٺِ رَھان ۽ آنءُ ڊِڄان، خَرچُ وڏو آ
ڪٿي وڃي لِڪان اَڪيلو، خود کي ڳولھيان
گڏِجي لِڪَ ڇِپَ راندِ ڪيان خَرچُ وڏو آ