پاڻَ کان پاڻَ زِندَگي شِشدَرُ
وَقتَ جي هر گهَڙي گهَڙي شِشدَرُ
سِجَ ۽ چَنڊ تان بِہ ٿي آيُس
مون ڏِٺي آھِ روشِني شِشدَرُ
دوستي ، پيارُ ۽ وَفا آھِن
مُرڪَ، ڀاڪُر، پِرين، چُمي شِشدَرُ
هو انڌيرن ۾ پِڻ لَھي ايِندو
ڀل ٿِيَن چَنڊ، چاندِنيِ شِشدَرُ
تُنھِنجو، مُنھِنجو بِہ خوُن ٿيِندو هِتِ
خوابَ ۾ اَڄُ زَميِنَ ٿيِ شِشدَرُ
ڪھِڙي چانئُٺِ تي سِرُ جهُڪايان مان
هَر عِبادَتَ ۽ بَندَگي شِشدَرُ
گوُنجَندي چيِخَ ھِڪَ رَھي هردم
تو ٻُڌي، مون ٻُڌي لڳي شِشدَرُ
تو قيامَتَ ڪَڏھن ڏِٺي آھي ؟
ذَرو ذرو ذَريِ ذَريِ شِشدَر