آھي آلاڻِ اَکِ ۾ رُنو ڪيرُ هو
مائِٽُ مُنھِنجو پُڇان ٿو سَڳو ڪيرُ هو
سَڀُ ھَوا تي سَواريِ ڪَري ويا هِتان
پو اَڱڻَ مُنھِنجي آخر لَٿو ڪيرُ هو
ورھيَہ ٿيا هوُ ڪڏھن ڪونَ آيو نَظر
پو لِئو پائيندي مون ڏِٺو ڪيرُ هو
پُرزا پُرزا ڏِٺو پاڻَ کي ھَر گهَڙي
ڇيِھوُن ڇيِھوُن بڻيو هو، سڄو ڪيرُ هو
ذَهنُ آ قيد ۾، روحُ آ قيدَ ۾
قيدَ مان زِندگيءَ جي ڇُٽو ڪيرُ هو
آ اَنڌيرو پُٺيان، آ اَنڌيرو اَڳيان
چِڻنگ ٻارَڻ لَٿو اوچِتو ڪيرُ هو
ڪو تَہ عالِمُ مليو، ڪو مليو مَعتبَرُ
تون ئي چَئُہ مون جِيان ڀورِڙو ڪيرُ هو