ذهن مان سَڀُ ڌِڪي ڪَڍيِ ڏِسجي
پاڻ سان ٿورڙو مِليِ ڏِسجي
آ ملاقات مؤتَ سان هر دم
ذائقو تنھنجو زِندگي ڏِسجي
عَرصي کان لڱ سڀ تَتَل ٿا لڳن
زندگيءَ جو نِرڙُ ڇُھي ڏِسجي
پائي ريڙھيوُن چُران پُران پيو ٿو
وقت جي ٽنگَ ھِڪَ ڀَڃيِ ڏِسجي
آھي ٻُوساٽَ دِل اَندر ڏاڍي
ذهن جي کولي ڪا دَري ڏِسجي
سُھڻيءَ وانگر ڪَچي گهڙي تي ئي
زِندگيءَ جي نَدي تَري ڏِسجي
چيِچَ منھنجي جهَلي هَٿنِ پَنھِنجي
وقت کان ڪا گهَڙي گهُري ڏِسجي