سرويچ سجاوليءَ کي ڀيٽا
غربتن جي حالتن ۾، قربتون تو وٽ هيون،
همٿون ئي همٿون، بس همٿون تو وٽ هيون.
بي ڊپو بيباڪ ٿي، لُچن لُنبن کي تو لُنبيو،
جيءَ ۾ جايون ڏيائين، جرئتون تو وٽ هيون.
تون سراپا سونهن ساگر جو هئين طالب چٽو،
سونهن ۽ ساڃاهه سان، ڪي صحبتون تو وٽ هيون.
تو ڪئي محبت مُٺن مسڪين ماڻهن سان سدا،
مڻ مٺاين جي برابر محبتون تو وٽ هيون.
وقت پنهنجو قيمتي مارن کي تون ارپي وئين،
محنتون تو وٽ هيون ۽ فرصتون تو وٽ هيون.
امن عالم ۾ هجي ۽ سنڌ ٿئي سائي سُکي،
سنڌ جا ماڻهو جيئن هي حسرتون تو وٽ هيون.