جهاڳي جهاڳي هلبو جهنگ،
نيٺ ڏکن جو ٿيندو دنگ.
هار نه همٿ هلندو هل تون،
سنگت جو ڇن ساٿ نه سنگ.
ڏاڍ ستم کي ڏاري وجهبو،
باطل سان آ کليل جنگ.
لاهي وٺبو سر سلطاني،
چاهت مان ڏس چوري چنگ.
ڏاڍو ٿي اچ ڏونگر ڏرندا،
ڀونءَ کي پوڻو ناهي ڀنگ.
آزاديءَ جي آس اهائي،
ريج ڏئي رت ڌرتي رنگ.
لک لکي وٺ قوم جي خاطر،
ڏات هڻي ٿي ڏاڍو ڏنگ.
پيار خدا جي آهي عبادت،
پيار مان ڇو ٿيو آهين تنگ.
’عبد سنڌي‘ پيو لکندو رهندو،
ذهن کي لڳڻو ناهي زنگ.