حيدرآباد جون ”بارون“
صدر ۾ رٽز هوٽل اندر بار هُئي. جتي پياڪ اچي اُڃ اجهائيندا هئا. گاڏي کاتي ۾ ونڊسر بار به هُئي، فارول ۽ ڪپٽل بار به هُيون، ان کانسواءِ مارڪيٽ ۾ به ٻه مئه خانه هُئا، هڪ ٽاور جي ويجهو انور بار جي نالي سان هو، ٻيو وري اناج مارڪيٽ ۾ هڪ مئي خانو هو، جنهن جو نالو ياد ڪونهي پر هاڻي مئه نوشي تي پابندي کانپوءِ اڪثر بار ۽ شراب خانه ويران ٿي ويا، بقول عظيم شاعر مخدوم محي الدين ”يه عمارت تو عبادت گاهه هي، اس جگهه ايک ميکده تها کيا هوا“ انهن بار جو پنهنجو هڪ ڪلچر هڪ روايت، هڪ حسن هو سو سمورو مليا ميٽ ۽ تالان والان ٿي ويو. رٽز هوٽل جي سامهون حيدرآباد جي سڀ کان وڏي ۽ وچ ۾ لان ۽ گلن ڦلن واري ايڊون بار هوندي هئي، جتي صرف اعليٰ ذوق جا سنجيده ۽ باذوق ميخوار ۽ مئه نوش ايندا هئا.