دهشت جو ڏهڪاءُ،
ڌرتيءَ سان انياءُ،
وڌندو آيو وقت سان.
تاريخن جي روح ۾،
تاريڪيءَ جو گهاءُ،
ڌرتيءَ سان انياءُ،
وڌندو آيو وقت سان.
صدين جي تهذيب ۽،
تمدن جو ڪُرلاءُ،
ڌرتيءَ سان انياءُ،
وڌندو آيو وقت سان.
بيوس، بيحس قوم جو،
سورن سان سرچاءُ،
ڌرتيءَ سان انياءُ،
وڌندو آيو وقت سان.
اُڀَ کي ڏاري ٿو پيو،
ٻُرندڙ ڪو پڙلاءُ،
ڌرتيءَ سان انياءُ،
وڌندو آيو وقت سان.
ڌارين جي يلغار جو،
تن ساڙيندڙ تاءُ،
ڌرتيءَ سان انياءُ،
وڌندو آيو وقت سان.
جهُرڻو ٿي آڪاشُ پيو،
جهُرڻو هيءُ سوداءُ،
ڌرتيءَ سان انياءُ،
وڌندو آيو وقت سان.