شاعري

اڌورا اڌما

حسين سرور خوبصورت احساسن ۽ جذبن جو شاعر ھيو جيڪو جوانيءَ ۾ ئي اسان کان وڇڙي ويو. اسان جڏهن هن جي شاعري پڙهون ٿا تہ هوُ اسان جي اکين ۾ زندهه آهي. سندس شاعري پڙهندي محسوس ٿيندو تہ هي انھن نوجوان شاعرن مان آهي جن ڪڏهن بہ سياسي جدوجھد ۾ هلندي، سنڌ جي سونھن ورونھن ۽ آزادي لاءِ خواب ڏسندي عام نعرن جو سھارو نہ ورتو. حسين سرور پنھنجي شاعريءَ ۾ سماجي حقيقت نگاري ۾ رنگ ڀرڻ جي ڪوشش ڪئي آهي.

  • 4.5/5.0
  • 44
  • 15
  • آخري ڀيرو اپڊيٽ ٿيو:
  • حسين سرور
  • ڇاپو پھريون
Title Cover of book اڌورا اڌما

ڇيڙ نه تون تڪرار جون ڳالهيون،

ڇيڙ نه تون تڪرار جون ڳالهيون،
ساجن ڪر ڪي پيار جون ڳالهيون
.
مون سان ڪر تون پنهنجون ڳالهيون،
پاسي ڪر سنسار جون ڳالهيون.

دنيا داري ٿيندي پئي تون،
دل جي ڪر واپار جون ڳالهيون.

گلڙن جهڙا ماڻهو تو وٽ،
ڪاٿئون آيون خار جون ڳالهيون.

هر ڪو چاهي عيش پيو ماڻڻ،
ڪو به نه ڄاڻي دار جون ڳالهيون.

سڀ کي ڪيڏيون وڻنديون آهن،
پنهنجي پنهنجي يار جون ڳالهيون.

تون ڪيئن سمجهين محلن وارا؟
پيٽ بکايل ٻار جون ڳالهيون.

پنهنجي پير تي پاڻ ڪيو مون،
اوريان ڪيئن تنهن وار جون ڳالهيون.

ڪير ٻُڌي ٿو دل سان سرور
دل جي هتِ بيمار جون ڳالهيون.
*