حال ڪي اورجن، ويجهڙا جي ھُجون.
چس چپن چورجن، ويجهڙا جي ھُجون.
ڪاش ڀيڙا ھُجون، گوڏو گوڏي گڏي،
سور ڪي سورجن، ويجهڙا جي ھُجون.
مان پيو هت سڪان، تون پئي هُت سڪين،
ڪي گهڙيون تورجن، ويجهڙا جي ھُجون.
پاڻ آھيون پياسا ملون موڙ تي،
گيت ڪي گهورجن، ويجهڙا جي ھُجون.
ڇاڇري جي ڇيھہ تي تون ھُجين مان ھُجان،
ڀاڪرون ڀورجن، ويجهڙا جي ھُجون.
کڻ کڻي ھرمِچي ھرک جھڙي بدن،
پور ڪي پورجن ويجهڙا جي ھجون.
مند پن ڇڻ وري، آ ھلي تون پرين،
ڏار ڪي ڏورجن، ويجهڙا جي ھُجون.