نماز جي ٻئي شرط (ڪپڙا پاڪ ٿيڻ) جو بيان
سوال: ڪپڙن جي پاڪ هجڻ مان ڇا مُراد آهي؟
جواب: جيڪي ڪپڙا نماز پڙهندڙن جي بدن تي هجن، جيئن پهراڻ، سٿڻ، ٽوپي، پٽڪو وغيره انهن سڀني جو پاڪ هجڻ ضروري آهي، يعني انهن مان ڪنهن تي غليظ پليدي جو هڪ درهم کان وڌيڪ نه هجڻ، خفيف پليدي جو چوٿائي ڪپڙي تائين نه پهچڻ، نماز جائز ٿيڻ لاءِ شرط آهي، پوءِ جيڪڏهن غليظ پليدي هڪ درهم (رُپئي) يا انهيءَ کان گهٽ ۽ خفيف پليدي چوٿائي ڪپڙي کان گهٽ لڳل هجي ته نماز جائز ٿي ويندي پر مڪروهه ٿيندي.
سوال: جيڪڏهن پٽڪي جو هڪ پاسو پليد آهي، پر نماز پڙهندڙ انهيءَ پاسي کي جُدا ڪري ڇڏيو ٻئي پاسي مان اڌ پٽڪو ٻڌائين ته نماز جائز ٿيندي يا نه؟
جواب: جيڪو ڪپڙو نمازيءَ جي بدن سان اهڙو تعلق رکندو هجي جو انهيءَ جي چُرڻ سان اهو به چُري، اهڙي ڪپڙي جو پاڪ هجڻ شرط آهي، پوءِ انهيءَ صورت ۾ نماز نه ٿيندي، ڇو ته نمازيءَ جي چُرڻ سان پٽڪو ضرور چُرندو.