جَوانيءَ جاڳ جهڙي ڇوڪري
جَوانيءَ جاڳ جهڙي ڇوڪري،
اُلا ۽ آڳ جهڙي ڇوڪري.
وڏيرن جو وَئي ڄڻ کاڄ ٿي،
سَرينهَن جي ساڳ جهڙي ڇوڪري.
جَهلي ڪنهن کان به جَهلجي ڪا نه ٿي،
وَڇيريءَ واڳ جهڙي ڇوڪري.
وَڻن جا وار ڦِلهوري وَئي،
هَوا ڇُڙواڳ جهڙي ڇوڪري.
ڇڏي ٿي ساز ڇيڙي سوچَ جا،
پَهاڙي راڳ جهڙي ڇوڪري.
اسان تي آرَ جا ڪي وارَ ڪر،
چري ڪنهن چاڳ جهڙي ڇوڪري.
اسان لئه آشياني جيئن آ،
مِٺيءَ جي ماڳ جهڙي ڇوڪري.
سَڙي ٿي آسَ جي اُس ۾ پئي،
ڀٽُن جي ڀاڳ جهڙي ڇوڪري.