هِن ديس مِٺي جي هارياڻي!
هِن ديس مِٺي جي هارياڻي!
اُس ۾ جهار اُڏائين ويٺي،
وِکريل وار، اُڏائين ويٺي،
ڄَڻ ته ڄمار اُڏائين ويٺي،
او هارياڻي! او هارياڻي!
روز خوشيءَ مان کيٽ لُڻين ٿي،
ٻنيون، ٻارا ٻيٽ لُڻين ٿي،
ڀُونءَ سڄيءَ لئه ڀيٽ لُڻين ٿي،
او هارياڻي! او هارياڻي!
رت جو ڏين ٿي ريج ٻنيءَ کي،
حد کان زياده هيجُ ٻنيءَ کي،
ڏيندي آهي ڏيجُ ٻنيءَ کي،
او هارياڻي! او هارياڻي!
گرميءَ ۾ ڀي گاهه ڪڍين ٿي،
لابارا ۽ لاهه ڪڍين ٿي،
شُوڪاري سان ساهه ڪڍين ٿي،
او هارياڻي! او هارياڻي!
وَر سان حال ونڊيندي آهين،
ڇوڙي وار ڇنڊيندي آهين،
سارو جڳ مَنڊيندي آهين،
او هارياڻي! او هارياڻي!
هِن ديس مِٺي جي هارياڻي!