شاعري

سمبارا

هي ڪتاب خوبصورت شاعر، ليکڪ ۽ پبلشر ساجد سنڌيءَ جي شاعريءَ جو مجموعو آهي.
ساجد منهنجي انهن دوستن مان آهي جن وٽان اڻ ميو پيار ۽ پنهنجائپ ملي آهي، هو موٽ ۾ صرف هڪ مُرڪ گهرندو آهي. ماٺيڻي پر تخليق ۽ لکڻين ۾ ساگر جهڙي گهرائي رکندڙ ساجد سنڌيءَ وٽ مُرڪن جا خزانا آهن. سندس لکڻين ۽ شاعريءَ ۾ ڪشش آهي، هن جي قلم ۾ جنبش آهي. ساجد سراپا جدوجهد ۽ محبت آهي. سندس هي ڪتاب ان جو ثبوت آهي. منهنجي دوست هجڻ ناتي متان مان سندس تعريف ئي لکان پر هي تخليقون ۽ هي ڪتاب ان جا شاهد آهن.
  • 4.5/5.0
  • 6920
  • 921
  • آخري ڀيرو اپڊيٽ ٿيو:
  • ساجد سنڌي
  • ڇاپو پھريون
Title Cover of book سمبارا

راهه ڀُلجي پيا ريل ۾،

راهه ڀُلجي پيا ريل ۾،
نيڻ اٽڪي پيا ريل ۾.
 
ڄڻ ته واقف صدين جا هئا،
خواب رَلجي پيا ريل ۾.
 
هن نهاري کنئي جا نظر،
جام ڇُلڪي پيا ريل ۾،
 
الوداعي سفر کان اڳي،
يار سڏڪي پيا ريل ۾،
 

گفٽ هن هو ڪيو آئينو،
هٿ به ڇِلجي پيا ريل ۾،
 
ڪي مسافر ڊگهي بحث ۾،
نيٺ ٿڪجي پيا ريل ۾.
 
اجنبي ها هزارين مگر،
آشنا ٿي پيا ريل ۾.
 
ڪنهن قدم جو رکيا اوچتو،
ڄڻ مُئا جِي پيا ريل ۾.
 
کوڙ سپنا کڻي هان لٿو،
ڪجهه ڪِري ڀي پيا ريل ۾.
 
مرڪ ‘ساجد’ سجائي گهڻي،
ڳل ڀِڄي هِي پيا ريل ۾.