پبلشر نوٽ
اسان جي دور ۾ منظور سولنگي فوجي جنتائن کان وٺي زردارن جي حڪومتن تائين سنڌ سان ٿيندڙ ظلمن کي نه صرف پنهنجي نظمن ۽ تحريرن ۾ قلمبند ڪيو آهي پر ڊاڪيومينٽريز ذريعي انهن دردن جا پاڇولا اسڪرين تي ماڻهن کي ڏيکاري کين انهن اهنجن ۽ ايذائن جي پاتال تائين پهچائڻ جي ڪوشش ڪئي آهي.
هي ڊاڪيومينٽريز سنڌ جي هڪ جيئري جاڳندي ۽ ڳالهائيندڙ ٻولهائيندڙ تاريخ آهن. ايندڙ دور ۾ جڏهن تاريخ ڪتابن جي قرطاس مان نڪري واريءَ جي ذرڙن واري چپس تي هميشه لاءِ منتقل ٿيندي ته ان وقت هي ڊاڪيومينٽريز سنڌ جي تاريخ جو هڪ املهه ۽ محقق ماخذ بڻبيون.
هي اسان جي بدقسمتي آهي جو اسان وٽ پنهنجي رياست ڪونهي ۽ سنڌ دوست رياستي ادارا ڪونهن جيڪي سنڌ جي هن تمام وڏي اسڪرپٽ رائيٽر جي قابليتن ۽ مهارتن جو فائدو وٺي سنڌ جي انهن نون نسلن تائين پڄائڻ جو بندوبست ڪن جن مٿان نئين سنڌ اڏڻ جو بار آهي.
منظور سولنگي پنهنجي دور جو هڪ ليجنڊ ليکڪ ۽ ڏاهو ڏات ڌڻي آهي، هُن جي کرائي ۽ بي غرضي ڪنهن کي پسند نه به هجي پر هُن جي سنڌ سان غيرمشروط محبت، فدائيت ۽ جاکوڙ تي ڪي به ٻه رايا ناهن رهيا. هن سڄي زندگي هڪ کاهوڙي Activist جي حيثيت ۾ گذاري آهي. سنڌ جي اديبن، دانشورن ۽ ليکڪن پاران سنڌ جي وحدت ۽ ان جي اشوز تي آواز ۽ جاڳرتا اٿارڻ واري ويڙهه ۾ هو سدائين پهرين جوڙ جو ملهه رهيو آهي.
سندس قومي شاعري، مضمون ۽ هي ڊاڪيومينٽريز واريون تحريرون هُن جي سنڌ سان وابستگي ۽ فدائيت جون هميشه ساکي رهنديون.
اسان سنڌيڪا اڪيڊميءَ پاران سندس هن يادگار پورهئي کي ڪتاب جي شڪل ۾ محفوظ ڪري موجوده ۽ انهن ايندڙ نسلن لاءِ فائيل ڪري رهيا آهيون، جيڪي سڀني مصلحتن جي قيد ڪڙن کان آزاد ٿي نئين سنڌ اڏڻ لاءِ پنهنجي قابليتن ۽ مهارتن جو وارو وڄائيندا. ان وقت هي ڪتاب انهن لاءِ ماضيءَ جي درد انگيز داستانن جي پسمنظر مان نڪري مستقبل جي خوشحال سنڌ اڏڻ ۾ بيحد مددگار بڻبو.
نور احمد ميمڻ
چيئرمين، سنڌيڪا اڪيڊمي