ڏاند شماري
چاچا ڊاروِن ۽ سندس همخيالن اُٺ ڪتابن جا لکي رکيا آهن ته ڏاندن وغيره جي جن عضون مان ڪم نه وٺبو، اهي اڳتي هلي ناڪاره ٿي ويندا... اسين سنڌي ماڻهو موهن جي دڙي واري اڪلوتي ڏاند جا بلاشرڪت غيري اصلي تي وڏا ۽ باتصوير والي وارث آهيون... تنهن ڪري ڪنڌ لوڏي ’هلي ڍڳو پير پيران‘ واري آفاقي گيت تي عمل ڪرڻ اسان جو ثقافتي فرض آهي... اهو ئي سبب آهي جو اسان جا پير هٿن سميت روز بروز ’پير پيران‘ ٿيندا وڃن (دماغ جي خبر ناهي باقي ٻيا عضوا over use سب نهايت قوي ۽ مقويٰ آهن...)
هونئن ته پلاند وٺڻ ۾ پاڻ ايترا روشن دماغ آهيون، جو نانگ وانگر ستين سال به وير وٺڻ ڪونه وساريون... ننڍا وڏا مايون نياڻيون... هڙئي ماريو وڃو جيل ڀريون... باقي اليڪشن يا NFC ايوارڊ وقت ٿورڙي پريشاني ٿيندي آهي ته اسان جي ڏاند شماري الاجي ڇو گهٽجندي وڃي... باقي ڏاند شماري وڌائڻ لاءِ ٻيا هيٺ ڏنل طريقا پڻ مروج ڪري رکيا اٿئون ته بوقتِ ضرورت ڪم اچن...
1. ليڊي هيلٿ وزيٽرس جي گهر گهر رسائي سبب سائو ستارو پنهنجي پوري آب و تاب سان گڏ روشن آهن، تنهن ڪري ڪجهه وقت جي وقفي کان پوءِ سوزش سبب هميشه لاءِ وقفو ٿيو وڃي...
2. سنڌ جي روڊن رستن ۾ کڏن کوٻن نه هئڻ سبب زچه ۽ بچه اسپتال پهچڻ کان اڳ مرن اصل ڪونه ٿا... اسپتال پهچڻ کان پوءِ جي خبر ناهي...
3. آب شاهي کاتي جي ماهر عملدارن جي منصفانه تقسيم سب پڇڙيءَ تائين پاڻي پهچڻ کان اڳ دٻن ۽ تلائن ۾ تبديل ٿيو وڃي، پوءِ ماڻهو ۽ جانور گڏجي ان مصفا پاڻيءَ مان فيضاب ٿيندا رهن ٿا... نتيجي ۾ A کانZ تائين هيپاٽائيٽس، ڊينگي وائرس، گردن توڙ بخار وغيره جي پکڙجڻ سبب اموات جي شرح ٻڙي ٻڙي ۽ هڪ آهي، تنهن ڪري فڪر جي ڪا ڳالهه ناهي...
4. اپر سنڌ ۾ (هاڻي سڄي سنڌ ۾) ڪارين کي ڳاڙهو پوءِ بلو ۽ سائو بنائڻ واري حڪمتِ عملي زور شور سان چالو آهي... قبيلائي جهيڙا نه هوندا ته لکن جا ڏنڊ ۽ سڱن جي چٽيُن وارو گلشن جو ڪاروبار ڪئين هلندو؟ جوان نسل ڪُسندو وڃي باقي ڪوسڙ ڦنڊو مال ڪهڙو نسل وڌائيندو...
5. ڊرامن ۽ فلمن کان متاثر ٿي، جيڪي آزاد خيال جوڙا ڪورٽ مئريج ڪن ٿا، انهن جي پويان مائٽ ڪهاڙيون اڀيون ڪريو هلن... پوليس ۽ وڪيل به ڪواٽرن کان وٺي دارالامان تائين اعليٰ حسنِ ڪاردگيءَ جو مظاهرو فرمائيندا اچن... تنهن ڪري عقلمند ڏاندن هاڻي ٻيا ڪم خرچ بالانشين طريقا ايجاد ڪيا آهن... مثلن ڳريون بيل گاڏيون گَهِلڻ بدران هلڪا ڦلڪا ٽانگا هڪلڻ جو رواج وڌندو وڃي... حد اها ٿي وئي آهي جو هاليووڊ وارن پڻ سنڌين واري هن ’عِلت‘ مان فيضيابي شروع ڪئي آهي... ڪالهه اسان پنهنجين گنهگار اکين سان فلم JUNIORڏاڍي ذؤنق شؤنق سان ملاحظه فرمائي آهي، جنهن ۾ نر گابن جي حامل / حامله ٿيڻ کان وٺي ويم تائين پريڪٽيڪل ٽيڪنالاجي نهايت تفصيل سان سمجهائي اٿن...
ڀلا جي پوءِ پرميل بادفرنگ يا ڪينسر وغيره جو خطرو ٿي پيو ته به پرواه ناهي... عمران خان پٺاڻڻ لاءِ اڳئي اسپتال ٺهرائي ڇڏي آهي، سنڌي به داخلا وٺي سگهن ٿا... باقي ٻوڏ ستايل ڏاند گهڻا ڏينهن اڳ مزدوريءَ لاءِ وڏن شهرن ڏانهن اُسريل آهن، تنهن ڪري گهر شماري ۽ ڏاند شماري پاڻ ئي شهرن وارا يار پنهنجين ووٽر لسٽن ۾ لکائيندا ۽ شناختي ڪارڊ ٺهرائيندا...
هونئن به جي ٻيون ڪجهه M.P,A ۽ M.N.A جون سيٽون کٽيون وڌيون ته به خير آهي... سڻڀيون وزاتون ۽ گورنريون هونئن ئي وٽن آهن... ڀلا جي ڪڏهن ڪو وڏو گهپلو ٿيو ته مفاهمتي پاليسين ٺاهڻ جا پاڻ به ماهر آهيون... پوءِ اجرڪ ڳچيءَ ۾ وجهي معافين جا ٺڪا پيا پوندا...