نَڪِي حالي حوالي ٿيا، نڪي پرتا نڪي ويٺا
اچڻ سان ئي ڦٽائي منهن، ميارن تي وڃي پهتا
تلاش يار ۾ ويڙا وريا پئي طور تان واپس
وڃي پهتا ته آخر حسن وارن تي وڃي پهتا
بيان ’لا شيءِ‘ ۽ ’لا صورت‘ ڪرڻ خاطر سڀئي شاعر
چپن چشمن وانگر واسينگ وارن تي وڃي پهتا
زمين وارن جي هر هڪ مسئلي کي حل ڪرڻ خاطر
اسان جا رهنما اڄ چنڊ تارن تي وڃي پهتا
جهانِ جستجو گرداب ۾ ئي آه پوشيده
اهي خاموش ٿي ويا جي ڪنارن تي وڃي پهتا
جڏهن ڀي آزمائش ٿي، شجاعت جي صداقت جي
سڀئي سرڙا ڏيئي نيزن نظارن تي وڃي پهتا
ڏکيا سڀ ڏاڍ کان ڏرمائجي آهُن ۽ دانهن لئه
ڀٽائي ۽ قلندر جي مزارن تي وڃي پهتا
زبان کولڻ جتي سُوءِ ادب سمجهيو وڃي ’زخمي‘
اتي تفصيل بدران سڀ اشارن تي وڃي پهتا