گلن جي چاهه ۾ خارن سان مون آ پيار ڪيو
طريقو پيار جو نئون آ مون اختيار ڪيو
وفا ڪرين نه ڪرين يار تنهنجي آ مرضي
اسان ته تنهنجي جفائن تي اعتبار ڪيو
چيائين هاڻ قيامت ۾ پاڻ ملنداسون
اسان به روزِ قيامت جو انتظار ڪيو
رقيب آڏو گهريائين ثبوتِ عشق و وفا
اسان به سَٽ ڏئي دامن کي تار تار ڪيو
چيائين چاڪِ گريبان ته ڪائي ڳالهه نه آ
اڳي ته سر هئو منصور نذرِ دار ڪيو
وفا شعار آ ’زخمي‘ اوهان جي لئه بيڪار
اوهان پسند وڃي پاڻ جهڙو يار ڪيو