دردوندن جو هي آهي داستان، ڪنهن کي چوان
بره وارن جو هي باري آ بيان، ڪنهن کي چوان
آه پِنهان دل اندر رازِ نِهان، ڪنهن کي چوان
مان زبان هوندي به آهيان بي زبان، ڪنهن کي چوان
ڪير آ آئينه ساز ۽ ڪير آهي جلوه گر
ميزبان ڪنهن کي چوان ۽ ميهمان، ڪنهن کي چوان
پيش منظر ۽ پسِ منظر ۾ هڪڙو ئي فعال
مهربان ڪنهن کي چوان نامهربان، ڪنهن کي چوان
آيو ساقي آه بنجي بي مثل جو ٿي مثال
حد ڪهڙي آ يقين جي گمان، ڪنهن کي چوان
عمر ’زخمي‘ ’فاعلاتن فاعلن‘ ۾ ٿي گذر
ڪنهن کي مان حاصل چوان ۽ رائگان، ڪنهن کي چوان