صنم آهي خدا آهي يا ٻي ڪا ماجرا آهي
اوهان کي ئي خبر هوندي اوهان جي دل ۾ ڇا آهي
اچي ڏسبو، وڃي ڏسبو، رهي ڏسبو، وَهي ڏسبو
’زماني کي خبر ڪهڙي ته منهنجي دل ۾ ڇا آهي‘
گذارڻ لئه هتي آهي ضرورت ڪار بنگلي جي
جو خالي علم و عقل و عشق و جگر و دل ۾ ڇا آهي
شڪم شاهه شيخ صاحب غرق آ حلوي حڪومت ۾
بکيا پياسا ئي ڄاڻن ٿا حق و باطل ۾ ڇا آهي
ڏسڻ سان ئي حواس و هوش و عقل و فهم ٿيا حيران
ملايل ياالٰهي آب سان گڏ گِل ۾ ڇا آهي؟
هتي منزل آ مولا جي هتي آ عرش جو پايو
سمورو سوت آهي تون چوين ٿو دل ۾ ڇا آهي!
ڍڪيل آهي لڪل آهي زماني کان آ پوشيده
فقط مجنون ئي ڄاڻي ٿو ته هن محمل ۾ ڇا آهي
جناب شيخ جي منزل فقط غلمان ۽ حورون
بنا ديدار جي زخمي انهي منزل ۾ ڇا آهي
بتِ ڪافر کي پوڄيائين عمر ساري مگر هاڻي
هليو ’زخمي‘ آ عمري تي سو ان اٽڪل ۾ ڇا آهي!