ڪيئن تنهنجي دل جو يار درِ بند وا ڪجي
هن آهِ نارسا کي ڀلا ڪئين رسا ڪجي
هن درد و غم ۽ رنج و والم کي وداع ڪجي
”مدت ٿي ويئي آه ڪا محفل بپا ڪجي“
هڪ منهنجو ٿي رهين ۽ ٻيو وسري وڃئي رقيب
ان کان وڌيڪ ٻي ڀلا ڪهڙي دعا ڪجي
گر تو آ پاڻ ڪئي دلِ عشاق نيم نيم
دو نيم تنهنجو ڇو نه پو زلفِ دوتا ڪجي
راضي هجين خفا هجين تو ساڻ دل لڳي
توکي ڇڏي ٻيو ڪهڙو وڃي آشنا ڪجي
خونِ جگر سان پهرين هلي سارجي وضو
پوءِ دار تي نمازِ محبت ادا ڪجي
واعظ وياج کي آ منافعو بنائيو
هاڻي انهي منجهان ئي ٿو عمرو ادا ڪجي
گيهه، چانورن ۽ کنڊ جا ڀانڊا ڪري بليڪ
پوءِ ماربل جي مرمرين مسجد بنا ڪجي
ٻيو ڪو هجي ته ڦوڪ سان ئي واءُ ٿي وڃي
’زخمي‘ اڳيئي مست سو مستن کي ڇا ڪجي