صبح جو هڪڙا ڪجن ۽ شام جو ٻيا ٿي وڃن
يار اهڙا فيصلا ڪهڙا ڪري ڪهڙا ڪبا
يڪ زبان يڪ سُخن ٿي بس ڳالهه ڪر هڪڙي صفا
خالي خولي واعدا ڪهڙا ڪري ڪهڙا ڪبا
تون ئي هڪڙو منهنجو آهين سنگدل يا موم دل
تو بنا ٻيا دلربا ڪهڙا ڪري ڪهڙا ڪبا
آشنا هڪڙي ئي ڪيو آ دردِ دل ۾ مبتلا
ٻيا اڃا ڪي آشنا ڪهڙا ڪري ڪهڙا ڪبا
منهنجو ايس ايم ايس ڏسي هو فون کي رکيو ڇڏي
روبرو ٻيا رابطا ڪهڙا ڪري ڪهڙا ڪبا
بيهندو هُو ڪونه ’زخمي‘ ڪنهن به هڪڙي ڳالهه تي
سنگدل سان فيصلا ڪهڙا ڪري ڪهڙا ڪبا