غريب غربي ۽ پير و جوان جو خير هجي
سڄي جهان سان هالا نوان جو خير هجي
اٺن جو خير هجي ساربان جو خير هجي
غبارِ راه جو ۽ ڪاروان جو خير هجي
چمن کي چئني ڪنڊن کان آ دشمن گهيريو
’گلن جو خير هجي گلستان جو خير هجي‘
هجي ڪراچي يا ڪشمير چيچنيا يا عراق
الٰهي خير هجي ڪل جهان جو خير هجي
جڏهن محافظِ گل خود ئي ٿي پوي صياد
ته امن ڪهڙو ٿئي ۽ ڪٿان جو خير هجي
بندي کي بم هڻو ۽ خدا کي سجدو ڪريو
زمين کي باهه ڏيو آسمان جو خير هجي
اسان جا نالهءِ شب ۽ اوهان جي خاموشي
زبان جو خير ۽ اذنِ گران جو خير هجي
پياسا موٽي ويا بند ڇو آ مئخانو
صبو، صراحي ۽ پيرِ مُغان جو خير هجي