شاهه لطيف جي حضور ۾
محبتن جو مير آهي ڀٽ ڌڻي
عشق جي توقير آهي ڀٽ ڌڻي
تنهنجي پيرانديءَ پڻي سُرمون سندم
خاڪِ در اڪسير آهي ڀٽ ڌڻي
مذهبن ماڻهو منجهايا ملڪ ۾
دينِ حق سچ سير آهي ڀٽ ڌڻي
باهه بدامنيءَ جي آهي چؤطرف
ٿڌڙي تو وٽ هير آهي ڀٽ ڌڻي
ڪوڙ ڪچ وارا سڀن وٽ سرخرو
حق چوڻ تقصير آهي ڀٽ ڌڻي
مارُويون ڪاريون ڪريو ڪُهندا وڃن
سنڌ جي تقدير آهي ڀٽ ڌڻي
سنڌ جو پاڻي ويا زوريءَ کڻي
جو ڪُڇي زنجير آهي ڀٽ ڌڻي
مڇ موذي آه ڏاڍو ٿي ويو
مورڙو دلگير آهي ڀٽ ڌڻي
پاند پاڻي دانهن ٿا توکي ڏيون
نيڻين هر ڪنهن نير آهي ڀٽ ڌڻي
روح پڻ ’زخمي‘ آ مرهم ٿئي عطا
دل به جهيرون جهير آهي ڀٽ ڌڻي