غزل
دستار ۾ ٿو عالم و فاضل نظر اچي
ڪارِ دگر ۾ ظالم و جاهل نظر اچي
نالي جو هر شريف ٿو ارذل نظر اچي
نامِ نهاد حق به ٿو باطل نظر اچي
ساقي جي مرڪ سرڪ جو سائل نظر اچي
واعظ به عاشقن ۾ ٿو شامل نظر اچي
اڳ ۾ ڪناري تي به هو طوفان جو اثر
هاڻي ته ڪشتي خود ئي ٿي ساحل نظر اچي
هن سان ملڻ بجاءِ ٿيو پاڻ سان ملڻ
شايد اڃان به دور ٿي منزل نظر اچي
شايد ازل ۾ پاڻ ٿيا هئاسون روبرو
تنهنجو ٿو انگ انگ سڃاتل نظر اچي
هر ڪنهن جي يار ۾ آ سندم يار جلوه گر
هر ڪنهن جي دل ۾ منهنجي ئي ٿي دل نظر اچي
بي مثل جي مثال ۾ ساقي به پيش پيش
ليڪن ٿو شرڪ شيخ کي شامل نظر اچي
لوڪان لڪل رهي ٿو هميشه وصي ولي
ظاهر ڀلي هُو پيار ۾ پاڳل نظر اچي
’زخمي‘ هو ڪالهه ناقص و نادان و ناشناس
صدقي ۾ تنهنجي هاڻ ٿو ڪامل نظر اچي