ڀل طُور تي چڙهي وتي هر هر صدا ڪندو
بيهوش ٿي ڪري پيو عاشق ته ڇا ڪندو؟!
محبوب ماه رُو به اگر ڪا خطا ڪندو
ته عاشق به هٿ کڻي پيو هر هر دعا ڪندو
جوشِ جنون ۾ رهجي ويا جي رڪوع سجود
ديوانو پاءِ يار تي بيشڪ قضا ڪندو
پيرِ مغان اگر درِ مئخانه بند ڪيو
رندِ الست ضربِ جبين ساڻ وا ڪندو
هڪ نقطي جو آ فرق ٻنهي جي اُچار ۾
هڪڙو دغا ڪندو ته پيو ٻيو دعا ڪندو
زخمِ جگر آ غنچو بَرنگِ گلاب ٿيو
خوشبو جو ڇا طبيب ڪو دارون دوا ڪندو
محبوب پرده پوش ستارالعيوب آ
’زخمي‘ تڏهن وتي ٿو هڪ نه ٻي خطا ڪندو