اگر جان توتان فدا ٿي پوي ها
ته هر ساه جو حق ادا ٿي پوي ها
مجازيءَ ۾ جَي دل فنا ٿي پوي ها
حقيقيءَ ۾ آخر بقا ٿي پوي ها
جي منهنجون مدايون ٿيون معلوم توکي
ڍڪين ها جَي ڍوليا ته ڇا ٿي پوي ها
گهرائين ها مون کي ته ڄڻ پاڻ آئين
جي مون وٽ اچين ها ته ڇا ٿي پوي ها
هو ترڇي نگهه جو نشانو به ترڇو
سڌو جي اچي ها قضا ٿي پوي ها
چڱو جو حڪايت زبان تي نه آئي
چپن تي چڙهي ها گلا ٿي پوي ها
کڻي نيڻ نازڪ نهارين ها نرمل
ته زخمي به ڄڻ باخدا ٿي پوي ها
نڪا لنئه لڳايئين نڪي آشنا ٿيو
ڪو ازخود ڀلا ڪيئن فدا ٿي پوي ها