نعت
اولاً تخليق ٿيو ارض و سما اَهنجي ڪري
ثانياً شمس و قمر آب و هوا اَهنجي ڪري
زندگي ۽ موت جي تخليق پڻ اَهنجي ڪري
ابتدا اَهنجي ڪري ٿي انتها اَهنجي ڪري
حضرتِ عشقِ الٰهي چاهيو اَهنجو ظهور
حُسنِ ڪُل آدم ۾ ٿيو جلوه نما اَهنجي ڪري
حق و باطل جو تعين آه سمجهايو اوهان
ظلمتن کان روشني ٿي وئي جدا اَهنجي ڪري
اَهنجي خاڪِ پا جي خوشبو پئي اڃا تائين اچي
ٿي مديني جي فضا آ جان فزا اَهنجي ڪري
هر منافق ڪفر کان پيو ساٿ جي قيمت گهري
پو مجاهد ڇو نه ڪن سر جي سخا اَهنجي ڪري
روزِ محشر ’زخميءِ‘ مضطر به اَهنجو منتظر
بااليقين ٿيندي شفاعت شافعا اَهنجي ڪري