چمن ۾ چؤطرف گولين بمن جي ٺا ۽ ٺُو آهي
بهارن ۾ خزان ۽ دامنِ گل ۾ لهو آهي
عجب سڪرات جي عالم ۾ آئي عيد آ ساقي
نه مئي جي بوند آ باقي نه ڪو ثابت سبو آهي
ڏڪاريا ٿي ويا ڏاڍا ۽ پبلڪ آ بکي بيوس
چمن ۾ خون جي بارش ۽ مالهي سرخ رُو آهي
اسان کان رب رسي ويو آهي صوم و صل رياڪاري
عمامه سڀ اداڪاري اجائي هو يا هو آهي
نه ڪعبي ۾ ڪليسا ۾ نه مسجد ۾ نه مندر ۾
هُو تنهنجي دل ۾ ويٺوآ اجائي جستجو آهي
سماع و مجلس و محفل، ڌيان و گيان، شو بازي
اصل مرشد وزارت آ ڊالر ستگرو آهي