احوال حالِ زار مناسب نه ٿو لڳي
اظهار بار بار مناسب نه ٿو لڳي
هر رات بيقرار مناسب نٿي لڳي
هر ڏينهن سوڳوار مناسب نه ٿو لڳي
هي عشق و صابريءَ جو سليقو ڪٿان سکئين؟
هي ماٺ جو مزار مناسب نه ٿو لڳي
ڪو زخمِ دل، ڪو چاڪِ جگر، چاڪِ پيرهَن
عاشق ۽ وضعدار مناسب نه ٿو لڳي
موسم ڪئي آ موٽ، صنم تون به موٽ ڪر
حسرت زده بهار مناسب نه ٿو لڳي
ڪو واعدو ڪا فون، ڪا مس ڪال ئي سهي
بي ڪيف انتظار مناسب نه ٿو لڳي
هڪ وار اتفاق سان ٿي ويندي آ خطا
اتفاق بار بار مناسب نه ٿو لڳي
فتوائون ڪي فساد، ڪي چندا ڪي چاشنيون
واعظ ۽ صبر يار مناسب نه ٿو لڳي
’زخمي‘ ڪا دانهن، ڪُوڪ، فُغان، نالهء بڪا
الفت کان پوءِ قرار مناسب نه ٿو لڳي