اوتري ئي ۾ وڪڻندس
”گهڻي ۾ وڪڻندين-؟“ مون پڇيومانس.
”تون ڪيترو افورڊ ڪري سگهين ٿو؟“ هن مون کان پڇيو. ۽ پوءِ آئون کانئس سندس ڪمپيوٽر جي قيمت پڇان ۽ هو هر وقت مون کان اهو پڇندو رهي ته آئون ڪيتري حد تائين خرچ ڪرڻ چاهيان ٿو. ان بحث ۾ پوڻ بدران چيومانس:
”عبدل ڳالهه ٻڌ! تون پنهنجي دل ۾ هڪ هزار ۾ وڪڻڻ چاهيندو هجين ۽ آئون ان کي گهڻو اوچو سمجهي ٻه هزار چوان، ته اها ته مون تي چٽي پئي. ساڳي وقت جيڪڏهن تنهنجو ڪمپيوٽر تمام مهانگو آهي ته منهنجي ننڍڙي آفر مناسب ناهي.“
نيٺ سينڍ ۾ مارئي ڳائڻ بدران هن کُلي ٻڌايو:
”گذريل سال ٿيسز لکڻ جي سلسلي ۾ فيلڊ ورڪ لاءِ سنگاپور ويو هوس ته اتان اٺين هزار ڪرونا (يعني چاليهه هزار روپين) جو ورتو هوم.“
”۽ هاڻي گهڻي وڪڻندين-؟“
”اوتري ۾ ئي! کڻي هڪ ٻه سئو ڪرونا گهٽ.“
” چڱو سوچينداسين.“ اسان اهو چئي کيس روانو ڪيو ۽ پوءِ پاڻ ۾ ٽيڪا ٽپڻي ڪندا رهياسين ته ڪمپيوٽر ڏينهون ڏينهن وڃن سستا ٿيندا ۽ هي جبوتيءَ جو درويش، سڄو سال استعمال ڪرڻ بعد به اوتري ۾ ئي وڪڻڻ چاهي ٿو!