منهنجي دل جو علاج ڪر سهڻي.
دل تي هٿ سان مساج ڪر سهڻي.
تنهنجي سامهون اچان ته گهٽ ۾ گهٽ،
مرڪ پنهنجي خراج ڪر سهڻي.
تون ملڻ لاءِ مالڪن اڳيان،
ٿورڙو احتجاج ڪر سهڻي.
هاڻ نفرت کي چاڙهه سوليءَ تي،
پيار وارو مزاج ڪر سهڻي.
عشق جي آءُ عرش معلى تي،
محبتن جو معراج ڪر سهڻي.
روح جي تون ئي صرف آن راڻي،
مون کي تون پنهنجو تاج ڪر سهڻي.
منهنجي ٽهڪن سان تون نڪاح ڪري،
منهنجي خوشين کي ڏاج ڪر سهڻي.
چنڊ، خوشبوء هوا ۾ رات سڄي،
مون سان ڪو امتزاج ڪر سهڻي.