دل جي آڳر تي ٽهڪن رقص ڪيو.
تنهنجي پهچڻ سان ڌڙڪن رقص ڪيو.
آزاديءَ سان مون اڄ جو ڪاڳر تي،
تنهنجو نانءُ لکيو اکرن رقص ڪيو.
ڇير ٻڌي آهي شيما ڪرماڻي،
موسم مهڪي پئي پن پن رقص ڪيو.
هٿڙن جي تاڙين هال ۾ جهونگاريو،
ڇا ته سهائي جي گهنگهرن رقص ڪيو.
آئي جيئن هواءِ ڪٿڪ لوڏ ڪري،
سهڻي چهري تي، زلفن رقص ڪيو.
هوءَ حقيقت ۾ پيار پئي پوکي،
رات به نيڻن ۾ سپنن رقص ڪيو.
اجري پاڻيءَ ۾ ڪنهن جو خواب هئو،
جنهن جي وهنجڻ سان لهرن رقص ڪيو.
ٻار پئي ٻهڪيا، پيريءَ پيار ڪيو،
سهڻو جيون ۾ جوڀن رقص ڪيو.